Internettproblem

Tysdag var det slutt på tilgangen til Internett. Eg forstod ingenting, og ingen såg ut til å ha peiling. Onsdag ringde eg ein serviceteknikar klokka 1300 som sa at det skulle bli fiksa innan to timar. Ingenting skjedde den dagen heller. Torsdag traff me ein kar som sa at han hadde same problem - det hadde faktisk advokatfirmaet som handterer huskjøp også - men denne karen hadde etter kvart fått vita at grunnen til daude breiband var at GT hadde innført nytt abonnentsystem og kutta alle. Kundane måtte møta opp på ein innbetalingsplass for å få nytt kundenummer og betala.

Jaja, me møtte opp i dag for å betala. Etter å ha stått i kø ei stund, blei me fortalt at me måtte gå ned i første etasje for å få nytt kundenummer. Der var køen endå større, utan noka form for kølapp eller liknande... Etter halvannan time ++ var me online att..

I går ringde eg callsenteret til GT klokka 1300, og blei fortalt at dei skulle ringa meg tilbake snart, noko som aldri skjedde. Så ringde eg sjølv i sjutida og venta på svar frå ein som sa at han skulle finna ut kva problemet var, men eg venta meir enn 15 minutt forgjeves. Eit forsøk til, og då seier operatøren at eg hadde ringt feil nummer, dei tok mot spørsmål om telefoni, ikkje internett. Jaja, eg ringde rett callsenter og måtte venta endå lenger før ein som kunne svara dukka opp. Han forklarte at det var innført nytt rekningssystem som gjorde at kundane måtte møta opp og gjera det eg har fortalt ovafor. Det skal ikkje vera lett!

Ganske merkeleg å sjå stablar av papir hjå eit selskap som skulle vera hightec i forhold til at dei driv telefoni og breiband. Eg undrar meg enno over at dei ikkje berre endra desse kundenummera i "nattens mulm og mørke" utan at nokon av oss merka det.

No er det snart helg, med ny ekspedisjon ut i terrenget. Sjå fram til meir njus.