Kulturopplæring

Fredag og laurdag har eg fått sett ein del lokal kultur og tradisjon igjen. Me kjørte langt for å treffa viktige folk (chiefar) i går, måtte venta i eit par timar til dei var ferdige med sitt møte, og så fekk me lov til å bli sett (og kanskje høyrt) av toppchiefen, medan me gav frå oss gåvene som høyrer med når ein vil ha kontakt med chiefar i eit område. Gåvene blei mottatt og fordelt, og så kunne me kjøra heim att. Om lag 10 timar var eg på farten for denne kortvarige overleveringa av det ein kanskje og kan kalla inngangsbillett til vidare samtalar. Mannen til venstre er formann for styret i kakaoforeninga i Ghana, og med det ein viktig mann. Du kan lesa om feiringa av 60-årsjubileet for denne organisasjonen og denne toppchiefen her:

http://www.myjoyonline.com/news/read.asp?contentid=10320

I dag (laurdag) var Ama og eg i nok ei gravferd. Broren til kokka vår drukna for eit par veker sidan og blei gravlagd i dag. Etterpå er det folkefest med mat og drikke, sang og dans - alt for å oppmuntra familien til den som er død. Det blir også rekna som ein fest for dei levande.